Main jaanta hu ki kuch bhi na kar paunga lekin...

Main jaanta hu ki kuch bhi na kar paunga lekin
koshish tamaam har baar kiya karta hu...


Jab bhi dekha hai tujhe ladte hue uljhano se apni
ek tukda neend maangte dekha hai jab tujhe ratjago se apni
"abki bhool jaa zid chhod de ye, kal fir dekhenge"
jab bhi dekha hai tujhe yun, baate karte hasrato se apni


main jaanta hu ki kuch bhi na kar paunga lekin
koshish tamaam har baar kiya karta hu...


tere muskaan chakhne me jab bhi aansuon ki namak jyada lagti hai mujhe
jab bhi teri khokhli kehkaho me jhooth ki damak jyada lagti hai mujhe
jab bhi kabhi daanv pech se bhari zindgi ke is khel me
tu dushman ke vajeer se pitne ki haalat me khadi ek pyaada lagti hai mujhe


main jaanta hu ki kuch bhi na kar paunga lekin
koshish tamaam har baar kiya karta hu...


jab bhi kabhi tere chashni me ghule bol meri zubaaN pe teekhe lagte hain
teri jhooth mooth ke banaye masoom shararto ki kahaniyaaN bhi jab feeke lagte hain
ya jab kabhi meri nam aankho ke liye tum jo deti ho mujhe aanchal
us aanchal ke kone jab pehle se mujhe bheege lagte hain

main jaanta hu ki kuch bhi na kar paunga lekin
koshish tamaam har baar kiya karta hu...